جیکب آباد : تحصیل ٹھل سے منتخب رکن سندھ اسمبلی ڈاکٹر سہراب سرکی نے سرکاری اسکول پر قبضہ کر کے گھر میں تبدیل کردیا۔
علاقے کے بچوں کا مستقبل داؤ پر لگ گیا۔ تفصیلات کے مطابق جیکب آباد کی تحصیل ٹھل سے منتخب رکن سندھ اسمبلی ڈاکٹر سہراب کی تعلیم دشمنی ظاہر ہوگئی، اپنے ہی حلقے کے سرکاری اسکول پرمبینہ طورپرقبضہ کرکے وہاں رہائش کیلئے گھر بناڈالا۔
رکن اسندھ اسمبلی ڈاکٹر سہراب کے آبائی گاؤں گڑھی حسن سرکی کے قریب ان کی آبائی زرعی زمین ہے۔ جہاں گاؤں دین گڑھ میں ان کے والد سردار واحد بخش سرکی کے نام سے منسوب پرائمری اسکول ہے ۔
مگراس اسکول میں اب بچے تعلیم حاصل نہیں کرتے بلکہ یہاں گھرآباد ہوگیا ہے ۔ رکن سندھ اسمبلی نے اس سرکاری اسکول پر قبضہ کرکے اپنی زرعی زمین پرکاشت کاری کرنے والے کسان کا گھرغیرقانونی طورپرقائم کرادیا ہے۔
اس سرکاری اسکول پر قبضے کے بعد علاقے کے سینکڑوں بچوں کا مستقبل داؤ پر لگ گیا ہے۔ طلباء اور ان کے والدین نے وزیراعلیٰ سندھ اور صوبائی سیکریٹری تعلم سے مطالبہ کیا ہے کہ اسکول سے قبضہ ختم کرایا جائے اورتدریسی عمل شروع کرایا جائے۔
+
