Police par koi dabao nahi, acha kaam karnay walay ko inaam dain gay: IG Sindh
- By Web Desk -
- Sep 13, 2018
Karachi: Naye IG Sindh ka kehna hai kay gair janib dar rehte huvay police apna kaam jari rakhay gi, Police par koi dabao nahi, Acha kaam karnay walon ko inaam diya jayega.
Tafseelat kay mutabiq naye IG Sindh kaleem imam mazar e quaid pohanchay. in kay hamra degar afsaraan bhi moujood thay. IG Sindh nay Mazar e quaid par fateha khuwani ki.
Mazar kay bahar Media say guftagu kartay huvay in ka kehna tha kay shukar guzar hun kay IG sindh bannay aur Khidmat karnay ka moqa mila yaqeen dilata hun Professionalism say kam krengay.
Inhon nay kaha kay Sindh police kay shuda aur lavaheqeen ko salam pesh karta hoon, Sindh police kay ghaziyon ko salam pesh karta hoon, ‘Shuda kay bachay hamaray bachay hain’.
IG Sindh ka kehna tha kay Karachi bara shehar hai, police ki salahyaton main izafa karengay. Hamarai kotahi ki nishandahi karen, awam ki hifazat hamari zimeedari hai. Naik niyati say kam karengay.
Inhon nay kaha kay hukummat khususan wazeer e aala Sindh nay hidayat ki hai kay hamen nateeja chiye. Gair janib dar rehte huvay police apna kaam police apna kaam jari rakhay gi, Police par koi dabao nahi, Acha kaam karnay walay ko inaam diya jayega.
IG Sindh ka mazeed kehna tha kay juraim main Police ahelkaron ko koi reayatnahi milegi.
Khayal rahay kay Kaleem imam nay Sindh Police kay 59 veen Inspector General (IG) ka charge guzishta roz sambhala hai.
Kaleem imam mehakma police say guzishta 25 saal say wabasta hain. Doctorate ki degree rakhnay walay Dr kaleem ko june 2018 main IG Punjab bhi banaya gaya tha.